Vëllaznimi e mposht Prishtinën në kryeqytet

Vëllaznimi i Gjakovës e ka mposhtur Sigal Prishtinën të premten mbrëma me rezultatin 66:62.

Ndeshja që u luajt në Pallatin e Rinisë dhe Sportit në Prishtinë i takoi xhiros së nëntë të Superligës së Kosovës në basketboll.

Për Vëllaznimin ishte fitorja e parë, pas pesë ndeshjeve. Ndërsa në total ishte fitorja e dytë këtë edicion, krahas shtatë disfatave.

Ndërsa për Prishtinën është humbja e pestë. Ka edhe katër fitore.

Pjesa e parë u mbyll baras 35:35. Vëllaznimi reagoi në çerekun e tretë duke e mbyllur me shifrat 55:47.

Edhe në dhjetëminutëshin e fundit, Vëllaznimi nuk lejoi befasi dhe në fund i fitoi pikët e plota.

Më i dalluari te Vëllaznimi ishte Amari Kelly me 29 pikë dhe 17 kërcime.

U veçua edhe Ardian Ibishi me dhjetë pikë dhe 14 kërcime.

Ndërsa lojë të mirë te Prishtina pati Ajiri Johnson me 17 pikë, gjashtë kërcime dhe dy asistime.