Dekretohet Ligji për Byronë, nis faza e zbatimit për verifikimin e pasurisë

Kryetarja e Kuvendit të Kosovës, Albulena Haxhiu, ka njoftuar se Ligji për Byronë Shtetërore për Verifikimin dhe Konfiskimin e Pasurisë së Pajustifikueshme po hyn në fazën e zbatimit.

Haxhiu bëri të ditur se sot ka pranuar nga Presidenca dekretin për shpalljen e këtij ligji, dy javë pas miratimit të tij në Kuvend.

“Për secilin që ushtron funksion publik, është e qartë se çdo pasuri duhet të ketë burim të ligjshëm dhe të dokumentuar”, ka deklaruar ajo.

Kryetarja e Kuvendit theksoi se institucioni që drejton do ta përcjellë nga afër procesin e themelimit të Byrosë, ndërsa rezultatet e zbatimit të ligjit do të jenë matësi kryesor për qytetarët.

“Qytetarët do ta matin këtë ligj me rezultatet që do të japë”, përfundoi Haxhiu.