Daniel Bochsler është ekspert i politikës serbe dhe i sistemeve zgjedhore, me më shumë se dy dekada kërkim shkencor mbi Ballkanin Perëndimor. Deklaratat e tij u publikuan në një intervistë për mediumin zviceran Watson.

Eksperti i politikës serbe, Daniel Bochsler, ka deklaruar se çështja e Kosovës vazhdon të jetë temë tabu në politikën e Serbisë, ndërsa ka folur edhe për qëndrimet brenda lëvizjes studentore që ka shënuar fitore në zgjedhjet parlamentare kundër partisë së Aleksandar Vuçiqit.

Në një intervistë për mediumin zviceran Watson, Bochsler, i cili prej më shumë se 20 vitesh studion politikën serbe, ka thënë se në Serbi është shumë e vështirë të gjendet ndonjë parti politike që flet hapur për pavarësinë e Kosovës.

“Çështja e Kosovës është një tabu politike në Serbi. Nuk do të gjeni në Serbi ndonjë parti ku dikush të flasë hapur për pavarësinë e Kosovës”, ka deklaruar Bochsler, transmeton Telegrafi.

Flamujt nacionalistë gjatë protestave

Duke komentuar raportin e lëvizjes studentore me nacionalistët serbë, Bochsler ka theksuar se gjatë protestave janë shfaqur edhe persona që mbanin flamuj me mbishkrime dhe simbole që e paraqesin Kosovën si pjesë të Serbisë.

Megjithatë, sipas tij, lëvizja studentore ka arritur të mbajë jashtë listës zgjedhore një numër të madh të kandidatëve me qëndrime të theksuara nacionaliste.

Vetoja e këshillave studentorë

Ai ka shpjeguar se kjo është arritur përmes mekanizmit të vetos, të cilin e kanë përdorur këshillat studentore në universitete dhe fakultete gjatë përzgjedhjes së kandidatëve.

Sipas tij, ky mekanizëm ka funksionuar relativisht mirë brenda lëvizjes studentore, duke bërë që shumë kandidatë nacionalistë të mos përfshihen në listën zgjedhore.

Bochsler ka shtuar se, në fund, nga lista janë përjashtuar edhe përfaqësuesit më të qartë të të dy krahëve politikë brenda lëvizjes, si ata me qëndrime të theksuara nacionaliste, ashtu edhe ata me pozicione më të hapura ndaj Kosovës.

Qëndrimi i qeverisë së re mbetet i paqartë

Sidoqoftë, mbetet e paqartë se çfarë qëndrimi konkret do të mbajë qeveria e re e Serbisë ndaj Kosovës, pasi lëvizja studentore përbëhet nga grupe me bindje të ndryshme ideologjike.

Sipas vlerësimit të Bochslerit, kjo heterogjenitet i brendshëm e bën të vështirë parashikimin e politikës së jashtme që do të ndjekë qeveria e re, veçanërisht në raport me dialogun dhe çështjen e Kosovës. /KosovaNews/