VV-ja nesër mban mbledhjen e Këshillit të Përgjithshëm, bëhet prezantimi dhe zgjedhja e kandidatit për kryeministër
Lëvizja Vetëvendosje e ka thirrur mbledhjen e Këshillit të Përgjithshëm për nesër, më 9 maj 2026, ditë e shtunë, duke filluar nga ora 10:00.
Sipas rendit të ditës, në fokus të mbledhjes do të jenë prezantimi dhe zgjedhja e kandidatit të Lëvizjes Vetëvendosje për kryeministër të Republikës së Kosovës, si dhe diskutimi për finalizimin e kandidaturave për deputetë në zgjedhjet parlamentare të 7 qershorit.
Në rend dite janë paraparë edhe miratimi i procesverbalit nga mbledhja e kaluar, caktimi i procesmbajtësve, fjala e kryetarit të Lëvizjes dhe njëherazi kryeministrit të Kosovës, Albin Kurti, si dhe diskutime mbi situatën politike në vend.
Po ashtu, Këshilli i Përgjithshëm pritet të autorizojë kryesinë qendrore për finalizimin e listës së kandidatëve për deputetë.
Njoftimi është nënshkruar nga Arbërie Nagavci, kryesuese e Këshillit të Përgjithshëm të Lëvizjes Vetëvendosje.
The post VV-ja nesër mban mbledhjen e Këshillit të Përgjithshëm, bëhet prezantimi dhe zgjedhja e kandidatit për kryeministër appeared first on KosovaNews.
