Sot vendoset për “53-milionëshin”, pritet aktgjykimi ndaj Pal Lekajt dhe tre të akuzuarve
Gjykata Themelore në Prishtinë pritet ta shpallë sot aktgjykimin ndaj ish-ministrit të Infrastrukturës, Pal Lekaj, dhe tre të akuzuarve të tjerë në rastin e njohur si “53-milionëshi”.
Përveç Lekajt, në këtë rast akuzohen edhe ish-këshilltari i tij politik, Eset Berisha, ish-sekretari i Përgjithshëm i Ministrisë së Infrastrukturës, Nebih Shatri, si dhe ish-drejtori i Prokurimit Publik në këtë ministri, Besim Tahiri.
Çështja gjyqësore është në rigjykim, pasi Gjykata e Apelit, në shkurt të vitit 2025, e anuloi aktgjykimin e mëparshëm të Gjykatës Themelore dhe e ktheu rastin në rivendosje.
Në gjykimin e parë, Pal Lekaj ishte shpallur fajtor dhe ishte dënuar me 3 vjet e 8 muaj burgim, si edhe me ndalim prej 3 vjetësh e 6 muajsh për ushtrimin e funksioneve në administratën publike.
Ndërkaq, Eset Berisha ishte dënuar me 3 vjet e 3 muaj burgim dhe me ndalim të ushtrimit të funksioneve publike për 3 vjet. Nebih Shatri dhe Besim Tahiri ishin dënuar me nga 1 vit e 8 muaj burgim dhe me nga 2 vjet ndalim të ushtrimit të funksioneve në administratën publike.
Megjithatë, këto dënime u anuluan nga Gjykata e Apelit dhe nuk përbëjnë vendim përfundimtar. Për këtë arsye, sot pritet një vendim i ri nga Gjykata Themelore, pas përfundimit të rigjykimit.
Në seancën e fundit, Prokuroria Speciale e Republikës së Kosovës qëndroi pranë aktakuzës dhe kërkoi që Lekaj dhe të akuzuarit e tjerë të shpallen fajtorë dhe të dënohen sipas ligjit. Prokuroria kërkoi gjithashtu shqiptimin e dënimeve plotësuese, përfshirë ndalimin e ushtrimit të funksioneve në administratën publike.
Nga ana tjetër, mbrojtja i kundërshtoi pretendimet e prokurorisë dhe kërkoi lirimin e të akuzuarve nga akuzat.
Gjatë fjalës së fundit, Pal Lekaj deklaroi se është i pafajshëm. Gjatë rigjykimit, ai është mbrojtur në heshtje.
Aktakuza e Prokurorisë Speciale lidhet me pagesën shtesë prej 53 milionë e 100 mijë eurosh ndaj kompanisë “Bechtel & Enka”, për zgjatjen e afatit të përfundimit të punimeve në autostradën “Arbën Xhaferi”, në segmentin Prishtinë–Hani i Elezit.
Sipas pretendimeve të prokurorisë, Lekaj dhe të akuzuarit e tjerë, në cilësinë e personave zyrtarë, kanë tejkaluar kompetencat dhe nuk i kanë përmbushur detyrat zyrtare gjatë trajtimit të marrëveshjes për zgjatjen e afatit të punimeve për 347 ditë.
Prokuroria pretendon se marrëveshja ishte nënshkruar pa përcaktuar koston financiare, duke i krijuar mundësi kompanisë që fillimisht të kërkonte rreth 63 milionë euro.
Pas negociatave, kjo shumë ishte ulur në 53 milionë e 100 mijë euro dhe më pas ishte aprovuar për pagesë nga Qeveria e Kosovës.
Sipas aktakuzës, veprimet e të akuzuarve dyshohet se i kanë shkaktuar buxhetit të Kosovës dëm në vlerë prej mbi 38 milionë eurosh, krahasuar me rreth 14.7 milionë euro që ishte rekomanduar nga kompania mbikëqyrëse “Hill International”.
The post Sot vendoset për “53-milionëshin”, pritet aktgjykimi ndaj Pal Lekajt dhe tre të akuzuarve first appeared on KosovaNews.
