Franca bëhet gati për një tjetër fundjavë protestash: Autoritetet nisin një operacion të gjerë sigurie

Sipas Ministrisë së Brendshme, autoritetet franceze do të ndërmarrin një operacion sigurie, duke angazhuar rreth 70,000 oficerë policie në të gjithë vendin gjatë fundjavës.

Njësi speciale, helikopterë dhe topa uji

Në këtë operacion do të përfshihen njësi speciale, helikopterë, automjete të blinduara, qen policie dhe topa uji. Për më tepër, do të shtohet numri i ushtarëve të ushtrisë franceze të cilët zakonisht patrullojnë në Paris si pjesë e masave kundër terrorizmit, me qëllim që policia të lirohet nga detyrat e qëndrimit statik në postblloqe apo pika ruajtjeje.

Të premten, ministri i Brendshëm Laurent Nunez dha një paralajmërim të ashpër për këdo që kërkon të shkaktojë probleme, duke deklaruar se qeveria do të jetë “e palëkundur ndaj atyre që përfshihen në akte shkatërrimi”.

Dhuna e javës së kaluar pasoi javë të tëra protestash lidhur me arsimin, perspektivat e zymta të punësimit dhe koston e jetesës. Edhe pse fillimisht ishin paqësore dhe me pjesëmarrjen kryesisht të studentëve, demonstratat u shndërruan shpejt në valën më të rëndë të dhunës vdekjeprurëse në shkallë kombëtare që prej vitesh.

Këtë javë, në disa qytete janë vendosur orë policore për të ndihmuar në ruajtjen e qetësisë.

Përgatitjet për të shtunën

Për pasditen e së shtunës është thirrur një demonstratë e madhe në Paris, ku mediat franceze presin pjesëmarrjen e qindra mijëra njerëzve.

Protesta organizohet nga sindikata kryesore studentore e Francës, UNEF, ndërsa një nga sindikatat më të mëdha të vendit, CGT, ka njoftuar se do t’i bashkohet. Pritet të marrin pjesë edhe grupe të tjera, përfshirë fermerë, aktivistë për klimën dhe “Jelekverdhët” (Yellow Vests) – lëvizje që u shfaq për herë të parë në vitin 2018 gjatë protestave kundër çmimeve të karburantit.

Megjithëse protesta në Paris është autorizuar nga autoritetet, të enjten presidenti francez Emmanuel Macron ndaloi të gjitha protestat që nuk organizohen nga sindikatat për ditën e shtunë, në përpjekje për të vënë nën kontroll trazirat civile.

Hapësirat publike pastrohen nga materialet e rrezikshme

Masat e marra shkojnë përtej ndalimeve dhe paralajmërimeve të policisë; kjo edhe për faktin se trazirat e javës së kaluar shkaktuan kritika ndaj autoriteteve, të cilat u akuzuan se nuk e kishin marrë kërcënimin mjaftueshëm seriozisht.

Bashkia e Parisit njoftoi më herët gjatë kësaj jave se po pastronte hapësirat publike nga pajisje dhe materiale që mund të përdoreshin për të shkaktuar dëme, përfshirë barriera, kosha mbeturinash, materiale ndërtimi dhe sende të tjera.

Muze, metro dhe ngjarje kulturore të mbyllura

Shumë nga vendet kryesore turistike në kryeqytetin francez, përfshirë muze të famshëm botërorë si Luvri (Louvre), Musee d’Orsay dhe Musee de l’Orangerie, do të jenë të mbyllura të shtunën.

“Art Basel” e mbylli të premten edicionin parizian të panairit të tij, dy ditë më herët sesa ishte planifikuar. Opera Kombëtare e Parisit i anuloi shfaqjet e së shtunës, duke përmendur protestat si shkak, ndërsa sipas autoriteteve bashkiake të Parisit, të paktën dy duzina stacionesh të metrosë do të jenë gjithashtu të mbyllura për pjesën më të madhe të ditës.

Të dielën, në stadiumin “Stade de France”, pak jashtë kryeqytetit, është planifikuar të zhvillohet një ndeshje e NFL-së midis ekipeve “Pittsburgh Steelers” dhe “New Orleans Saints”. Edhe pse ndeshja pritet të zhvillohet, një aktivitet për tifozët e “Steelers” në Paris është anuluar nga NFL-ja.

Bilanci i dhunës së javës së kaluar

Gjatë trazirave të fundjavës së kaluar, të paktën dy persona humbën jetën dhe shumë të tjerë pësuan lëndime të rënda, përfshirë dy persona që humbën duart.

Ministri francez i Drejtësisë, Gerald Darmanin, deklaroi se rreth 2,700 persona janë ndaluar për t’u marrë në pyetje, ndërsa 232 të tjerë janë burgosur në lidhje me trazirat.

Materiali është përgatitur mbi bazën e raportimeve të mediave ndërkombëtare.

/KosovaNews/