Kërkohet një e dyshuar për vjedhje të pijeve në Prizren
Policia e Kosovës ka vënë në kërkim një person të gjinisë femërore, nën dyshimet se më 21 maj 2024, rreth orës 18:15 në rrugën “Rrustë Kabashi” në Prizren, ka vjedhur disa pije alkoolike në një qendër tregtare.
Pas raportimit, në kamera sigurisë nga policia është vërejtur një femër e moshës së re, e cila merr disa pije dhe largohet në drejtim të panjohur.
Policia ka publikuar fotografinë e së dyshuarës nga video-regjistrimet nga kamerat e sigurisë dhe kërkon ndihmën e qytetarëve për identifikimin e saj.
“Të gjithë qytetarët që kanë çfarëdo informate apo dinë për vendndodhjen e së dyshuarës në foto, të raportojnë policinë në Prizren në numrin 192, në rrjetet sociale, në faqen zyrtare të Facebook-ut të policisë apo në cilindo stacion të policisë në Kosovë”, thuhet në njoftim.
