Maqedonci: Një sulm i mundshëm nga Serbia mbetet ende i pranishëm
Ministri i Mbrojtjes, Ejup Maqedonci, ka vlerësuar se edhe pse ka rritje të numrit të ushtarëve të KFOR-it në Kosovë, rreziku nga futja e armëve të reja dhe një sulm i mundshëm nga Serbia mbetet ende i pranishëm.
Lidhur me mundësinë e rrezikut të një sulmi të ri nga Serbia, ministri i Mbrojtjes, Ejup Maqedonci, ka theksuar se shqetësimi nuk është vetëm për aspektin operativ dhe taktik të forcave të armatosura serbe, por edhe për politikën agresive dhe hegjemoniste të strukturave politike në Serbi.
Në Debat Plus, ministri Maqedonci ka thënë se politika agresive dhe tentativa për hegjemoni regjionale e Serbisë është kryesorja në rritjen e tensioneve në rajon.
“Normalisht shqetësimi gjithmonë është prezent dhe shqetësimi nuk lidhet vetëm me aspektin operacional dhe taktik që zhvillojnë forcat e armatosura të Serbisë përgjatë vijës kufitare dhe as vetëm me grupet e armatosura dhe të uniformuara të sponziruzuara dhe të mbështetura nga strukturat e sigurisë së Serbisë”, ka thënë ai.
Ai gjithashtu ka bërë të ditur se grupet e armatosura joformale të mbështetura nga strukturat e sigurisë së Serbisë janë një element rreziku, duke shtuar se ndëshkimi i tyre është i domosdoshëm për të parandaluar destabilizimin e mëtejshëm të rajonit.
“Pikë së pari bazamenti i gjithë problemit qëndron tek politika agresive dhe hegjemoniste që strukturat shtetërore politike në Serbi shfaqin në raport me Kosovës por edhe me fqinjë të tjerë, pra bazamenti është aspekti politik, hegjemonia, tentativa për hegjemoni regjionale e Serbisë që mbështet dhe pasohet me veprime të ndryshme në këtë rast edhe me veprime te grupeve të armatosura joformale të cilat tentojnë destabilizim dhe rritje të synimeve politike shtetërore të Serbisë. Këto grupe paraqesin rrezik pasi nuk janë ndëshkuar nga Serbia, vazhdojnë të qarkullojnë brenda territorit të Serbisë, gjithmonë me iniciativë për t’u infiltruar prapë në territorin e vendit tonë”, ka deklaruar ministri Maqedonci.
Në veçanti, ministri Maqedonci ka theksuar se përderisa drejtuesi i këtyre grupeve terroriste, Milan Radojçiq, është ende në liri, kjo e bën situatën edhe më të rrezikshme.
“Këto grupe kanë një hierarki, kanë prijësin e tyre, Milan Radojçiq që akoma gjendet i lirë. Ne besojmë që këto grupe janë të rrezikshëm përderisa nuk ndëshkohen dhe përderisa ajanë të lirë të qarkullojnë dhe të veprojnë në Serbi”, ka deklaruar Maqedonci.
Maqedonci, mes tjerash ka thënë se dhe pse ka një rritje të numrit të ushtarëve të KFOR-it në Kosovë, rreziku nga hyrja e një armatimi të ri të grupeve terroriste serbe mbetet ende i pranishëm.
Lajmet Maqedonci: Një sulm i mundshëm nga Serbia mbetet ende i pranishëm >> Rahoveci INFO.
