Shqipëria zgjat deri në 2027 pjesëmarrjen e trupave ushtarake në KFOR
![shqiperia-zgjat-deri-ne-2027-pjesemarrjen-e-trupave-ushtarake-ne-kfor](https://rahoveci.info/wp-content/uploads/2024/03/106318-shqiperia-zgjat-deri-ne-2027-pjesemarrjen-e-trupave-ushtarake-ne-kfor.jpg)
Këshilli i Ministrave të Shqipërisë vendosi sot shtyrjen deri në 31 dhjetor 2027, të pjesëmarrjes së Forcave të Armatosura të Shqipërisë në operacionin ushtarak ndërkombëtar KFOR në Kosovë.
Në mbledhjen e sotme, Këshilli i Ministrave miratoi disa ndryshime në vendimin “Për pjesëmarrjen e Forcave të Armatosura të Republikës së Shqipërisë në operacionin ushtarak ndërkombëtar KFOR në Kosovë”.
Konkretisht, u vendos kohëzgjatja e këtij misioni nga 31 dhjetor 2024 në 31 dhjetor 2027.
Gjithashtu, në vendim ndryshon edhe dieta për ditët e qëndrimit, pasi nga 6 000 lekë në ditë shkon në 12 mijë lekë në ditë, përveç pagës mujore.
Vendimi parashikon se periudha e qëndrimit në mision për çdo përfaqësues do të jetë me sistem rotacioni çdo 6 muaj dhe 1 vit për postin ACOS SPT, periudha, të cilave u shtohen edhe ditët e qëndrimit për ndërrimin me kontingjentin e radhës (marrje dhe dorëzim detyre, vonesa të transportit strategjik).
Efektet financiare, që rrjedhin nga zbatimi i këtij vendimi, përballohen nga buxheti i Ministrisë së Mbrojtjes.
Lajmet Shqipëria zgjat deri në 2027 pjesëmarrjen e trupave ushtarake në KFOR >> Rahoveci INFO.