Qeveria godet Prokurorinë dhe Brukselin për Banjskën: E kanë raportin, shqetësuese që s’ka aktakuzë e as masa ndaj Serbisë
Pas deklaratës së zëdhënësit të BE-së, Peter Stano, se Kosova nuk i ka dorëzuar raport të hetimeve për sulmin në Banjskë, zëdhënësi i Qeverisë së Kosovës, Përparim Kryeziu, tha se një raport 48-faqesh për Banjskën ia kanë dorëzuar Bashkimit Evropian dhe shteteve anëtare vitin e kaluar.
Kryeziu tha se Stano duhet ta ketë këtë informacion por shtoi se nëse ai e ka fjalën ëpr raportin që duhet të përgatitet nga prokuroria e vendit “atëherë kjo është një çështje për të cilën duhet të kërkojmë përgjigje nga vetë ky institucion”.
Ai shtoi se është shqetësuese dhe e pakuptimtë që pas 9 muajve nuk ka aktakuzë për Millan Radojiçiqin dhe se bashkësia ndërkombëtare nuk ka ndërmarrë masa ndaj Serbisë.
Zëdhënësi i Qeverisë deklaroi se Radojiçiqi vazhdon të mbetet i lirë dhe se është rrezik potencial i vazhdueshëm për sigurinë dhe paqen në rajon.
“Si Qeveri e Republikës së Kosovës, brenda kompetencave tona, kemi përpiluar një raport 48-faqësh në lidhje me sulmin terrorist dhe paramilitar, të cilin ia kemi dorëzuar Bashkimit Evropian dhe secilit shtet anëtarë qysh vitin e kaluar. Këtë informacion besoj që zëdhënësi Stano duhet ta ketë. Nëse ai në deklaratat e tij të vazhdueshme e ka fjalën për raportin që duhet të përgatitet nga prokuroria e vendit, atëherë kjo është një çështje për të cilën duhet të kërkojmë përgjigje nga vetë ky institucion. Për ne, mbetet tejet shqetësuese dhe e pakuptimtë që edhe pas 9 muajve, në njërën anë nuk ka aktakuzë nga prokuroria e vendit për Millan Radoiçiq dhe në anën tjetër bashkësia ndërkombëtare, përfshirë Bashkimin Evropian, nuk ka ndërmarrë masa ndaj Serbisë, përkundër fakteve që dëshmojnë përfshirjen e saj në sulmin e 24 shtatorit të vitit 2023. Rikujtojmë që Radoiçiq vazhdon të mbetet i lirë dhe rrezik potencial i vazhdueshëm për sigurinë dhe paqen në rajon”, tha Kryeziu në një përgjigje për Express.
Zëdhënësi i BE-së, Peter Stano, ka thënë se për “të proceduar” me veprime për sulmin terrorist në Banjskë duhet të finalizohet raporti i hetimeve nga autoritetet e Kosovës.
“Hetimi duhet të përfundohet nga autoritetet e Kosovës. Kjo është diçka që ka ndodhur në territorin e Kosovës dhe autoritetet e Kosovës janë në krye të hetimit dhe të sigurojnë ose të ndajnë gjetjet e plota të hetimit dhe kjo s’ka ndodhur ende, prandaj nuk mund të procedojmë pa e pasë rezultatin e hetimeve”.
Stano tha se menjëherë pas sulmit e kanë bërë të qartë atë se çfarë BE-ja kërkon nga Kosova dhe Serbia kur është në pyetje për “pjesëmarrjen e mundshme apo mbështetjen nga ana e Serbisë për këtë sulm të tmerrshëm”.
“Kjo është ose duhet të jetë subjekt i investimeve dhe të gjeturat, shpresojmë, të kenë në raportin final të hetimeve, që ende nuk është përfunduar akoma ose nuk është ndarë me ne së paku”.
Lajmet Qeveria godet Prokurorinë dhe Brukselin për Banjskën: E kanë raportin, shqetësuese që s’ka aktakuzë e as masa ndaj Serbisë >> Rahoveci INFO.
