Presidentja Osmani pranoi letrat kredenciale nga ambasadori jorezident i Danimarkës

Osmani pranoi letrat kredenciale nga ambasadori jorezident i Danimarkës.

Presidentja e vendit, Vjosa Osmani, sot ka pranuar letrat kredenciale nga ambasadori jorezident i Danimarkës, në Kosovë, Christian Grønbech-Jensen, të cilit i ka uruar edhe mirëseardhje.

Sipas Osmanit, marrëdhëniet ndërmjet të dy shteteve janë shumë të mira, ndaj në këtë kontekst, shfaqi besimin se ato do të intensifikohen edhe më tej gjatë mandatit të ambasadorit Grønbech-Jensen, njofton Klankosova.tv.

Në takim me ambasadorin Grønbech-Jensen, presidentja Osmani ka folur edhe për zhvillimet aktuale politike dhe të sigurisë në vend dhe ka theksuar se institucionet e vendit janë të përkushtuar për paqe e stabilitet.

Siç bën të ditur Zyra e Presidentes, Osmani ka thënë se Kosova ka nevojë për mbështetjen e mëtejme nga Danimarka, sa i përket anëtarësimit në Këshillin e Evropës, por edhe në organizata të tjera ndërkombëtare.

Nga ana tjetër, ambasadori Grønbech-Jensen ka theksuar se Danimarka e mbështet anëtarësimin e Kosovës në Këshillin e Evropës dhe në të njëjtën kohë, e mirëpret aplikimin e Kosovës për anëtarësim në BE.

Ndër të tjera bashkë biseduan edhe për thellimin e bashkëpunimit ndërmjet të dy shteteve në fushën e energjisë, shkëmbimit ekonomik e tregtar, arsimit, drejtësisë si dhe sfera të tjera të interesit të dyanshëm.

Ballina
RadioRahoveci
Video
Këmbimi
Moti
error: Ku po shkon !!