Ndoye bëhet me skuadër të re
Sulmuesi zviceran, Dan Ndoye, është transferuar te Nottingham Forest pas një sezoni të shkëlqyer në Serie A. Klubi anglez ia doli ta fitojë garën për shërbimet e tij përballë interesimit të madh nga Napoli.
Ndoye tashmë është zyrtarisht lojtar i Nottingham Forest. Klubi anglez, që kohët e fundit kishte kaluar në avantazh ndaj Napolit me një ofertë prej 40 milionë eurosh drejtuar Bolognës, ka arritur marrëveshjen përfundimtare.
Forest e ka prezantuar 24-vjeçarin me një kontratë pesëvjeçare, ndërsa lajmi u bë i ditur përmes kanaleve zyrtare në rrjetet sociale.
“Jam shumë i lumtur që u bashkova me Nottinghamin,” u shpreh Ndoye, i cili realizoi golin vendimtar në finalen e Kupës së Italisë sezonin e kaluar.
“Është një moment shumë emocionues për klubin dhe menjëherë e ndjeva se dua të jem pjesë e këtij projekti. Është një skuadër me shumë ambicie dhe me një histori të mrekullueshme. Mezi po pres të nis aventurën time këtu,” shtoi ai.
