KQZ: Janë hapur të gjitha qendrat e votimit në Veri

Zëdhënësi i KQZ-së, Valmir Elezi, në një konferencë për media, ka bërë të ditur se janë hapur të gjitha qendrat e votimit në Veri.

“Duke u mbështetur në të dhënat që kemi pranuar nga Komisionet Komunale të Zgjedhjeve, ju njoftojmë se janë hapur të gjitha qendrat e votimit”, tha ai.

Elezi ka treguar numrin e qendrave të votimit në katër komunat veriore.

“Edhe sipas njoftimeve të mëhershme të KQZ-së, numri i Qendrave të Votimit në komunën e Leposaviqit është 8, në Zubin Potok 5, në Zveçan 5 dhe në Mitrovicën e Veriut 5. Në përgjithësi, numri i Qendrave të Votimit në këto katër komuna është 23, me gjithsej 63 vendvotime”, tha ai.

Elezi ka thënë se numri i qytetarëve me të drejtë vote për procesin e votimt për apo kundër largimit të kryetarëve nga funksioni në komunat Leposaviq, Zubin Potok, Zveçan dhe Mitrovicë e Veriut është  46,556 votues.

Ai ka ftuar qytetarët në veri që ta shfrytëzojnë të drejtën për të votuar.

“Në emër të KQZ-së, ftoj të gjithë qytetarët e komunave Leposaviq, Zubin Potok, Zveçan dhe Mitrovicë e Veriut që ta shfrytëzojnë këtë të drejtë të tyre për të marrë pjesë në procesin e votimit dhe të deklarohen nëse janë për apo kundër largimit nga funksioni të kryetarit të komunës së tyre”, tha ai.

Lajmet KQZ: Janë hapur të gjitha qendrat e votimit në Veri >> Rahoveci INFO.