Flet Ancelotti, tregon a po largohet nga Real Madridi

Menaxheri i Real Madridit, Carlo Ancelotti hodhi poshtë sugjerimet se ai është nën presion nga drejtuesit e Real Madridit pasi ata janë në vendin e dytë në renditjen e La Liga dhe u eliminuan nga Liga e Kampionëve javën e kaluar.

E ardhmja e Ancelottit është vënë në pikëpyetje pas humbjes së tyre në çerekfinale të Ligës së Kampionëve ndaj Arsenalit, me raporte të shumta që sugjerojnë se ai mund të largohet nga Reali në fund të sezonit për të marrë përsipër ekipin kombëtar të Brazilit.

Trajneri i Bayer Leverkusenit, Xabi Alonso dhe ish-trajneri i Liverpool-it, Jurgen Klopp, janë ndër emrat që janë lidhur me postin e trajnerit të Realit në javët e fundit.

I pyetur nëse e ndjente presionin, trajneri italian u tha gazetarëve: “Klubi është i vetëdijshëm se ka qenë një vit më i ndërlikuar se viti i kaluar. Së bashku i menaxhojmë vështirësitë, muaji i mjaltit vazhdon, jam shumë i lumtur, shumë i lumtur, me shumë presion, por kështu është gjithmonë. Suksesin e sheh shumë afër dhe është normale që stresi të rritet, por stresi është karburant për mua, nuk më shqetëson, më jep më shumë energji për të menduar për më shumë gjëra. Për sa kohë që vazhdoj të zgjohem në mëngjes, gjithçka është në rregull”, ka thënë Ancelotti.

Reali është ende në kërkim të suksesit në fronte të shumta dhe është i dyti në renditjen e ligës me 69 pikë nga 32 ndeshje, katër prapa rivalëve të Barcelonës.

Ata përballen me Barçën në finalen e Kupës së Mbretit këtë fundjavë , por më parë do të udhëtojnë në Getafe të vendit të 12-të për një takim në ligë të mërkurën, ku do të jenë pa Kylian Mbappe dhe Ferland Mendy .

Sulmuesi Mbappe pësoi një dëmtim në kyçin e këmbës në humbjen 2-1 të Realit në ndeshjen e kthimit çerekfinale ndaj Arsenalit javën e kaluar, ndërsa mbrojtësi Mendy po rikuperohet nga një dëmtim i kërdhokullës.