Festa familjare për pak kthehet në tragjedi, çfarë ndodhi gjatë natës në Tiranë

Një festë në Tiranë për pak është kthyer në tragjedi pasi arma që mbante një nga personat e pranishëm, dyshohet se u shkrep aksidentalisht dhe u dëmtuan tre persona. Tre persona kanë mbetur të plagosur. Policia ka shpallur në kërkim 32-vjeçarin Edison Elezi. I riu dyshohet se ka qëlluar me armë zjarri pistoletë brenda ambienteve të një lokali. Edison Elezi është djali i pronarit të kompanisë së “Ujit Lajthiza”, Hajri Elezi.

Njoftimi i policisë:

Më datë 23.07.2024, rreth orës 01:35, janë paraqitur në një spital privat, për ndihmë mjekësore, shtetasit E. P., 36 vjeçe, A. P., 36 vjeç, dhe D. P., 34 vjeç, me dëmtime të shkaktuara dyshohet nga armë zjarri.

Këta shtetas, rreth orës 01:30 të mëngjesit të sotëm, kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës.

Nga tërësia e veprimeve hetimore paraprake është bërë i mundur identifikimi i autorit të dyshuar, shtetasit E. E., 32 vjeç, banues në Tiranë.

Ky shtetas dyshohet se aksidentalisht, me një armë zjarri të cilën e mbante pa leje, ka bërë një shkrepje të pavullnetshme, dhe si pasojë e saj janë dëmtuar shtetasit e mësipërm.

Shtetasit D. P., dhe A. P., pas marrjes së ndihmës mjekësore janë larguar për në banesë, ndërsa shtetasja E. P., ndodhet në spital, nën kujdesin e mjekëve, jashtë rrezikut për jetën.

Grupi hetimor, nën drejtimin e Prokurorisë, po vijon punën për dokumentimin e plotë ligjor të këtij rasti dhe kapjen e shtetasit E. E.

Lajmet Festa familjare për pak kthehet në tragjedi, çfarë ndodhi gjatë natës në Tiranë >> Rahoveci INFO.