EHF-ja ia beson Federatës së Hendbollit e Kosovës një tjetër ngjarje të rëndësishme
Pas organizimit shembullor në Prishtinë të dy Evropianëve për hendbollistë të rinj gjatë këtij viti, Federata e Hendbollit e Kosovës e ka fituar të drejtën e organizimit të një tjetër ngjarjeje të rëndësishme kontinentale.
Bëhet e ditur se të premten Komiteti Ekzekutiv i Federatës Evropiane të Hendbollit vendosi që “Women’s 17 EHF Championship” të organizohet në Kosovë.
Ky kampionat për hendbollistet deri në 17 vjet do të organizohet në vendin tonë nga 4 deri më 10 gusht 2025.
Me organizimin e Evropianit (B) U17, federata jonë synon të rikonfirmohet si organizatore dhe nikoqire shembullore. Për organizimet e deritashme, FHK-ja është vlerësuar në superlativ nga EHF-ja dhe nga federatat e vendeve pjesëmarrëse.
”Federata e Hendbollit e Kosovës e falënderon Federatën Evropiane të Hendbollit për besimin dhe bashkëpunimin e shkëlqyer. Në Vjenë po qëndrojnë edhe drejtuesit e FHK-së, presidenti Eugen Saraçini dhe ushtruesi i detyrës së sekretarit të përgjithshëm, Muhamet Arifi. Të shtunën e të dielën ka aktivitete tjera të rëndësishme në kryeqendrën austriake, ndërsa me shumë vëmendje pritet edhe shorti i fazës së dytë kualifikuese për Botërorin e hendbollisteve. Pjesë e shortit do të jetë edhe Kombëtarja jonë”, thuhet në njoftimin e FHK-së./21Media
