Rahovec: Dhjetëra gra dhe vajza përmbyllin leximin e Kur’anit gjatë Ramazanit

Në qytetin e Rahovecit, muaji i shenjtë i Ramazanit është kurorëzuar me një aktivitet të veçantë shpirtëror, ku rreth 60 gra dhe vajza kanë përfunduar së bashku leximin e plotë të Kur’anit.

Ky organizim, i zhvilluar përgjatë gjithë muajit në Qendrën Kulturore, u karakterizua nga pjesëmarrje aktive e grave, të cilat çdo ditë lexonin pjesë të Kur’anit, duke e kthyer mukabelen në një përvojë të përbashkët dhe gjithëpërfshirëse.

Përveç aspektit fetar, aktiviteti shërbeu edhe si një mundësi për forcimin e lidhjeve mes pjesëmarrëseve dhe për thellimin e përkushtimit ndaj vlerave shpirtërore që mbart Ramazani.

Në përmbyllje, u mbajt një program i veçantë në Xhaminë e Çarshisë, ku u bë lutja e hatmes në një atmosferë të ngrohtë dhe plot emocion. Të pranishmet shprehën mirënjohje për këtë përvojë dhe shpresë që aktivitete të tilla të vazhdojnë edhe në të ardhmen.

Ky organizim konsiderohet një shembull i mirë i angazhimit të grave në jetën fetare dhe komunitare në Rahovec.